UCHRASHUV

Uchrashuv... Biz 5 qavatli yangi uylarda yashaymiz. O`sha kezlarda men atigi 12 yoshda edim. Uyimiz yangi. Qurilganiga nari borsa 5 yillarcha bo`lgan. Uyimizda ko`chaga olib chiquvchi eshik 2 ta edi. Biri uy oldida boshqasi uy orqasida joylashgan edi. Ammo qo`shnilarning "Sharofati" bilan orqa eshikka olib chiquvchi yo`l har xil kerak, keraksiz matahlar bilan to`sib qo`yilgan edi. Bir kuni uydagi barcha axlatlarni yelimxaltaga joylab tashlash uchun ko`chaga chiqayotgan edim. Birinchi qavatga tushganimda o`sha to`sib qoyilgan zinada kimnidir ko`rgandek bo`ldim. Chamamda 6 yoshlardagi bola. Menga yarim o`girilgan holatda turar edi. To`g`risi hayron qoldim. Bir necha daqiqa qimirlamagan holatda turdimda yo`limda davom etdim. Ko`chaga chiqgach nima uchundir ko`nglim xira tortdi. Axlatni tashlab qaytib kelayotganimda o`sha joyda yana o`sha bolani ko`rdim. Bu safar u menga qarab turar edi. Uning bir oyog`i tekis ikkinchisi esa yon tomonga qarab sal egilgandek edi. Xuddi oyog`i singanga o`xshar edi. Podyezdning g`ira-shira qorong`uligida uning yuzini aniq ko`ra olmadim. Ammo uning bo`ynidagi eniga tekis qizil chiziqni ko`rdim. Menimcha qizil marjondan tayyorlangan biror nima bo`lsa kerak. Uning yuzini ko`rmagan bo`lsam ham menga tikilib turganini aniq sezib turar edim. Shunda hayotimga tatigulik voqea yuz berdi. U menga qarab yura boshladi. Singan oyog`ini ko`tarib zinaga qo`ydi. Sog` oyog`ini yerdan ko`targanda esa g`iiiiiiiiiq etgan ovoz chiqdi. U yana singan oyog`ini keyingi zinaga qo`yib sog` oyog`ini yerdan ko`targanida yana g`iiiiiq etgan ovoz chiqar edi. Eng dahshatlisi u sog` oyog`ini yerdan ko`targanida singan oyog`i sezilarli darajada yon tomonga bo`rtib chiqar edi. Qo`rqib ketganimdan ko`chaga qarab otildim. Aksiga olib eshik ham ochilmas edi. U esa zinadan ko`tarilishda davom etar edi. Axiyri kuch bilan eshikka o`zimni otdim. Eshik sharaqlab ochilib ketdi. Ko`chaga ura qochdim. Toki biror qo`shnimiz ishdan qaytmagunga qadar uyga kirmadim. Bir qo`shnimiz ishdan qaytayotib meni uyimgacha kirgizib qo`ydi. Shu-shu hech qayerda yolg`iz yurmaydigan bo`ldim.