Muhabbatday oppoq oppoq tong otar

Тунлар аллалаган хаёлзорларда
Кўзларимга сурма тортар сулув туш.
Юрагимдан кечиб кетарман армон
Мени қамраб олар илоҳий оғуш.

Томиримда оқар, оҳ, муқаддас ишқ,
Сезгум етти фалак беғубор сасин.
Сезгум манглайимда бетимсол, азиз
Хилқатнинг илоҳий, ёниқ бўсасин.

Ложувард, мунаввар туннинг бағрида
Порлар буюк оят битилган қамар.
Сокинлик бағрига учаркан руҳим
Муҳаббатдай оппоқ, оппоқ тонг отар.