Shahzoda: “Ravshan menga uylanmoqchi ekanligini birinchi bo`lib Lolaga aytgan”

Xonanda Shahzoda jurnalist Jasur Hamroev bilan Facebook orqali jonli ravishda muloqot qildi. Muxlislar xonandaga o`zlarini qiziqtirgan savollarni berish imkoniga ega bo`ldi.

Muxlislardan biri Shahzodaga “Turmush o`rtog`ingiz bilan sevib turmush qurganmisiz?” deb savol berdi. Xonanda mazkur savolga javob berar ekan turmush o`rtog`i,xonanda Lolaning otasi Ravshan Yo`ldoshevning oilasini buzgani haqidagi mish-mishlarga ham barham berdi:

—Ravshan Yo`ldoshev rafiqasi bilan 1998 yilda ajrashgan. O`shanda men u bilan tanish emasdim. Men Ravshan bilan 2000 yilda tanishganman. U 6 yil davomida mehrimni qozonishga harakat qilgan. Men vijdonlilik, intizom va haqqoniylik doim birinchi o`ringa qo`yiladigan oilada katta bo`lganman. Shuning uchun ham u meni o`zining vijdonli, chiroyli qalb egasi ekanligi bilan mehrimni qozondi.

Agar biron inson birinchi nikohida topolmagan baxtin ikkinchi nikohida topsa, men buni to`g`ri qabul qilaman. Men qandaydir sabablarga ko`ra, birinchi oilasi bilan ajrashganlarga qarata aytmoqchiman: Hali hammasi yaxshi bo`ladi. Hayotda birinchi oilasi bilan ajrashib, ikkinchi marta mustahkam oilalar bunyod etilgan holatlari ko`p uchraydi.

Ravshandagi og`ir-vazminlik, o`ylab ish tutish, kam va past ovozda gapirishi kabi xislatlar menga manzur bo`lgan. Bundan tashqari, eng asosiyjihat esa u yaxshi ota. O`shanda, men u bilan tanishganimda ajrashgan bo`lishiga qaramay, farzandlarini jonidan oriq yaxshi ko`rishi e`tiborimni tortgan. U bolalarni judayam yaxshi ko`radi. Aqlligi, bolalarni sevishi, va albatta uning mehr to`la qalbi meni o`ziga rom etgan.

“Turmush o`rtog`ingizning birinchi nikohidan bo`lgan farzandlari sizlarning turmush qurishingizga qanday munosabat bildirdi?” degan savolga Shahzoda quyidagicha javob berdi:

—Hamma Shahzoda Lola bilan dugona edi. Keyin uning otasini tortib oldi, oilasini buzdi, deb gapirishadi. Ravshan meni Lola bilan o`zi tanishtirgan. Biz u bilan “Sevinch” filmida birga suratga tushganmiz. Ravshan o`shanda men bilan uchrashib yurardi. Ravshan menga uylanishi haqida birinchi bo`lib, Lolaga aytgan. Ravshan Lolaga:“Onang bilan, afsuski munosabatlarimiz yakun topdi. Men aynan Zilola bilan oila qurmoqchiman” degan. Ravshanning aytishicha, o`shanda Lola judayam xursand bo`lgan. Otasiga uni baxtli bo`lishini istashini aytgan. Shundan so`ng biz Lola bilan tez-tez gaplashadigan bo`ldik. Keyin u turmushga chiqdi. Biz uning to`yiga bordik. 5 yil uning ijodida tanaffus bo`ldi. Keyin esa bizning munosabatlarimizga nimadir bo`ldi... Nimaligini bilmayman.