KO'ZLARIMNI TARJIMA QILING

Tushunmassiz mening holatim,
Yigʻlang yoki ustimdan kuling.
Qani shuncha kuchli boʻlsangiz,
Koʻzlarimni tarjima qiling!

Qaylardasiz, baxt janoblari,
Shoshing, tezroq vaqt janoblari.
Shodlik koʻpmi, iztiroblarmi?
Koʻzlarimni tarjima qiling!

Qarodir u, tunga yaqindir,
U quyoshli kunga yaqindir.
Taxminlar ham mingga yaqindir,
Koʻzlarimni tarjima qiling!

Yurak berib oʻqingda bir bor,
Ziyrak boʻlib uqingda bir bor.
Tub-tubiga choʻkingda bir bor,
Koʻzlarimni tarjima qiling!

Samolarni quchib boradir,
Kipriklarim uchib boradir.
Sogʻinchlarni ichib boradir,
Koʻzlarimni tarjima qiling!

Soʻzlarimning uvoli tutar,
Koʻzlarimning uvoli tutar.
Koʻzingizdan tarjima kutar,
Koʻzlarimni tarjima qiling!