Onalar

Акс этганда муҳаббат
Ҳофизларнинг торида,
Бўлди ажиб бир танлов
Ўзбегим диёрида.

Меҳмон билан тўлди лиқ
Ўзбегим хоналари.
Бўлдилар бир ерда жам
Дунёнинг оналари.

Ҳакамларнинг олдига
Бир шарт қўйди халойиқ.
Эй, ҳакамлар, қай она
Олий ўринга лойиқ.

Айтинг бизга оналар
Ичра меҳрибонини,
Фарзанд учун қай она
Берар ҳатто жонини?

Одил баҳо берай деб
Кўп ўйлади ҳакамлар
Қирқ кун ўтиб орадан
Сўз сўйлади ҳакамлар:

Эй, халойиқ бу танлов,
Якун топди, ёпилди,
Оналарнинг барчаси
Ғолиб дея топилди.

Муаллиф: Ҳамид Насруллоев