Onamga she'r (2019)

ОНАМ..

Қалбимнинг турида соғинчлар қат-қат,
Нигохларимда қайгу ва ҳасрат,
Сочларим оқарди аччиқ ҳақиқат,
Онажон, мен сизни жуда соғиндим!..

Бу аччиқ ҳаёт жуда бешафқат,
Кўксимни наштарга тўлдирди фақат,
Бир чимдим умрингиз экан омонат,
Онажон, мен сизни жуда соғиндим!.

Бир дилкаш топмадим онажон сиздай,
Бир дардкаш топмадим онажон сиздай,
Шундай кенг дунё мен учун тордай,
Онажон, мен сизни жуда соғиндим!..

Ҳайқиргим келар ларзага келиб,
Чинқиргим келар бир гўдак бўлиб,
Кўнглим тошмокдаку йиғлагим келиб,
Онажон, мен сизни жуда соғиндим!..

Бағрингиз тафтини хумори қўзғар,
Кўзингиз сеҳрини хумори қўзғар,
Ширин аллангизнинг хумори қўзғар,
Онажон, мен сизни жуда соғиндим!..

Ёшим уч мучал гўдакман ҳануз,
Дардин айтолмаган мурғакман ҳануз,
Сиз орзу қилган тилакман ҳануз,
Онажон, мен сизни жуда соғиндим!.

Пойингизга бошим қўйиб ухласам,
Аллангизга руҳим тўйиб ухласам,
Нурли кўзингизга яна тикласам,
Онажон, мен сизни жуда соғиндим!.