Hayolimdasiz

Кўзларимни юмсам сиз,
Кўзларимни очсам сиз,
Ҳаёлимда биргина
Фақат сизни исмингиз.

Ўнгу тушимда ҳам сиз,
Ақлу ҳушимда ҳам сиз.
Англаганим шугина
Фақат сизни исмингиз.

Билмам қай фасл ёзми куз,
Эшитилмас оҳанг, сўз,
Эшитилар жимгина
Фақат сизни исмингиз.

Кечами ёки кундуз,
Ўтар гўёки фарқсиз.
Беради таскин, гина
Фақат сизни исмингиз.

Умримнинг матлаби сиз,
Кўнглимнинг талаби сиз.
Истаганим ягона,
Фақат сизни исмингиз.

Балки бир бор келмассиз,
Бехабарсиз билмассиз.
Эслайман кулибгина,
Фақат сизни исмингиз.

Қани энди билсангиз,
Тушларимга кирсангиз.
Уйғонсам айтибгина
Фақат сизни исмингиз.

Юпанчим, умидимсиз,
Яшаяпман жим, сассиз,
Секин шивирлабгина
Фақат сизни исмингиз.

ШАҲНОЗА РЎЗИЕВА