Nigohlar

Menga ishqingizdan bo‘lganda ogoh,
E’tibor bermadim dil ohingizga.
Ko‘zingizga ko‘zim tushdi-yu nogoh,
Ko‘ngil berib qo‘ydim nigohingizga.

Yurak qoni ila bitsangiz ash’or,
O‘qidim-u tanda turmadi titroq.
Hayajonda sevgi etsangiz izhor,
Menchi, nigohingiz o‘ylardim ko‘proq.

Sezganmisiz balki o‘zingiz ham yo‘q,
Qaro ko‘zingizda bor edi mehr.
Bir boqsa yurakka qadar edi o‘q,
Muhabbat yashardi, jo edi sehr.

Bilib-bilmay ko‘nglim beribman e voh,
Shirin xayollarga asir va bandi.
Bir kun barchasidan bo‘lganda ogoh,
Yuragim..
Lovullab-lovullab yondi.

Sotdingiz ne uchun ishqni arzonga,
Tangrim o‘zi o‘tsin gunohingizdan.
Asir bo‘libman-da soxta yolg‘onga,
Oxir kuyib qoldim, nigohingizdan...

Dilobar Uralova