Yig'loqiginam

Yig'la, hovuchimni tutib turaman,
To'lsa, ko'zlarimning kosasiga quy!
Sen yig'lab bo'lguncha jimib turaman,
So'zlarim yarangni tig'lamasin, qo'y!

Yig'la, ko'zyoshlaring yuvsin yuzingni,
Ro'molchani qo'ygin, artma matoga.
Indama, o'zingni o'z holingga qo'y,
Ko'zyoshlaring borib yetsin Xudoga!

Yig'la, ko'zyoshingni artaman o'zim!
Sen qo'rqma, hadikma qilmayman ta'na.
Axir men ularga o'xshamayman-ku,
Olisda ustingdan kulyaptii, ana!

Yig'la, o'shalarga e'tibor berma,
Menga ko'zyoshingdan quyib bergin sen.
Chalg'ima, cho'chima. Hech ikkilanmay,
Ularni Xudoga qo'yib bergin sen!

Yig'la ayamasdan kipriklaringni,
To'xtatma, ko'zyoshing daryoday oqsin.
Dardingdan qo'shib qo'y ko'zyoshlaringga,
Borib boshlariga baloday yog'sin!

Yig'la... faqatgina soxta bo'lmasin,
Yig'lasang chin dildan, yurakdan yig'la!
Seni yig'latganlar yonib to'ymasin.
Yig'lasang, Robbim de, Xudo deb yig'la!

Yig'la, dilginangni qilavergin to'q,
Hech kimdan uyalma yig'la, yig'layver!
O'zimdan o'zgaga keraging ham yo'q,
Yig'loqiginam, yig'la, yig'layver...!!!

Solih Sulton