Birovning haqqi

Сув билан ўлчанмас оловнинг ҳаққи,
Отлиққа не даркор яёвнинг ҳаққи,
Эскидан бир нақл қолган дўстларим,
Бировга юқмайди бировнинг ҳаққи.

Қашқирни ризқини ейолмайди шер,
Ҳалол бўл дунёда, ҳалол ризқинг тер,
Ҳамма ҳам ҳаётда ўз ризқини ер,
Бировга юқмайди бировнинг ҳаққи.

Нафс -ўпқон, нафс- бало,жиловсиз тулпор,
Нафси ўт кимсада бўлмайди ҳеч ор,
Дейдилар емоқни қусмоғи ҳам бор,
Бировга юқмайди бировнинг ҳаққи.

Мақтанма ҳеч топган давлатинг билан,
Бойлигинг ўлчанар ҳимматинг билан,
Пастлигинг яширма савлатинг билан,
Бировга юқмайди бировнинг ҳаққи.

Ҳеч ким олиб кетмас йиғиб кетади,
Искандар битигин уқиб кетади,
Бир кун бир ерингдан чиқиб кетади,
Бировга юқмайди бировнинг ҳаққи.

Имконсиз орзудан бир армон яхши,
Миннатли асалдан шўр нордон яхши,
Дунёда ҳар недан ҳалол нон яхши,
Бировга юқмайди бировнинг ҳаққи.

Хуршид Карим