Odamlar

Imkonga o‘xshaydi bazi odamlar,
Mehri ila darding tuzatadilar.
Tikonga o‘xshaydi bazi odamlar,
Sanchilib, yig‘lashing kuzatadilar

Rizvonga o‘xshaydi bazi odamlar
Yuzinga shodonlik ulashadilar
Hayvonga o‘xshaydi bazi odamlar
Faqat nafsi uchun kurashadilar.

Vijdonga o‘xshaydi bazi odamlar
To‘g‘ri yo‘lni topsang, alqab suyarlar.
Zindonga o‘xshaydi bazi odamlar
O‘zingni o‘zinga qamab qo‘yarlar.

Dostonga o‘xshaydi bazi odamlar
Dardini dunyoga tinmay aytadi.
Chistonga o‘xshaydi bazi odamlar
Sirlarga o‘ralib yashab o‘tadi.

Shaytonga o‘xshaydi bazi odamlar
Gunohga botsangiz huzurlar qilar
Iymonga o‘xshaydi bazi odamlar
Ko‘rsatgan yo‘lidan ajrlar tilar

Xaqiqiy oshiqdir bazi odamlar
Bir yorni sog‘inib, suyib o‘tarlar
Maьnosiz qo‘shiqdir bazi odamlar
Yoqimsiz sayrab, so‘ng olqish kutarlar

Dildorga o‘xshaydi bazi odamlar
Xammaga yaxshilik tilab yuradi.
Yuragi dardlarga to‘lib ketsa ham
Bildirmay, jilmayib kulib turadi

DILDORA ABDINAZAROVA