Бадандаги тукларни олиш ҳукми

Савол: ассалому алайкум! Инсон баданидаги қандай тукларни олиши мумкин. Баъзи манбаларда аврат жойларидаги тукларни олиш шартлиги, бошқаларида қош териш Аллоҳнинг лаънатига сабаб бўлиши айтилган. Шу хусусда тўхталиб ўтсангиз! Жавоб: ва алайкумус салом. “Аллоҳнинг лаънати бўлиши” ҳақидаги гап юзи ва қошидаги тукларни терувчилар (шунингдек, тердирувчилар) ҳақида айтилган. Жумладан, Ибн Аббос розийаллоҳу анҳудан қилинган ривоятда қоши ва юзидаги тукларни мўйчинак билан терувчи ва тердирувчи аёлларга лаънат бўлиши айтилган. Бу ривоятни Бухорий ва Муслим нақл қилишган. Инсондаги ҳаром туклар доим олиб турилиши керак. Масалан, аврат жойларидаги туклар узоғи билан қирқ кунда олинади. Ҳар ойда олинса, яхши. Қўлтиқ ости туклари ҳар ҳафтада олиниши афзал. Соч олиниши мумкин. Мўйлаб қистартирилади. Хуллас, ривоятда келган лаънат бўлиши ҳақидаги таҳдид қошини тердирувчи, юзидаги тукларни олдирувчиларга, сунъий гўзалликка ҳаракат қилувчиларга тааллуқлидир. Бироқ, олиниши буюрилган тукларни ўз вақтида олмаслик ҳам маъқул эмас. Инсоннинг фитрий ишлари сирасига аврат жойларидаги ва қўлтиқдаги тукларни қириш (кетказиш) киради. Шунингдек, мўйлаб қисқартирилади. Уни қириш ҳам мумкин. Бундан бошқа тукларни олиш ҳақида амр келмаган, адашмасам. Жумладан, қўл ва оёқдаги тукларни олиш шарт эмас. Юздаги тукларни олиш ва қошларни теришдан қайтарилгани юқорида айтиб ўтилди. Агар аёлнинг юзидан соқол ёки мўйлаб чиқса, жумҳур уламолар наздида, ўша тукларни олиб ташлаш мустаҳабдир. Баъзилар бу иш эрининг рухсати билангина қилинишини айтишган. Жумҳур уламолар аёл қўли, оёғи, қорни ва баданининг бошқа жойларидаги тукларни олиши мумкинлигига иттифоқ қилишган. Моликийлар бу ишни вожиб, дейишган. Валлоҳу аълам! manba: muxlis.uz