ASABIYLIKNI ENGIShNING 4 QOIDASI

Nega kayfiyatingiz yo`q? Nima bezovta qilayapti? Bunday savollar atrofdagilar e`tiboridan chetda qolmaydi. To`g`ri-da, birgina sizning kayfiyatingiz boshqalarnikiga ham ta`sir etishini bilmasmidingiz? Turli vaziyatlarda asabbuzarlikka duch kelishingiz tabiiy. Ammo bir o`ylab ko`ring, bu shunga arziydimi? Javob berishdan avval qanday qilib asabiylashmaslik qoidalari bilan tanishib chiqing...

Ishda boshlig`ingizdan dakki eshitganingiz uchun asabiylashayotgan bo`lsangiz, darhol o`zingizni qo`lga oling. Bir necha daqiqa toza havoga chiqib, chuqur nafas oling-da, yana ishingizga qayting. Xayolingizdagi turli noxush o`y-fikrlarni quvib, yaxshi narsalarni o`ylang. Ko`rasiz, bu foyda beradi!
Kimdandir arazlashdan avval «O`zimdan biror kamchilik o`tmadimikan?» deb o`ylab ko`ring. Mabodo o`zingizning aybsizligingizga ishonsangiz, juda yaxshi, araz-ginani yig`ishtirib, yana hayotdan zavq oling. Ko`rdingizmi, o`zingizni qanchalik haq deb bilsangiz, boshqalar ham o`zlari haqida xuddi shunday fikrda. Buning uchun asabiylashish shart emas.
Turmush o`rtog`ingiz bilan xafalashib qoldingizmi? Buning uchun ko`z yosh to`kib, asabingizni jilovlay olmay qolmang tag`in. Eng ma`quli biroz sukut saqlang. So`ng iliq dush qabul qilib, achchiq qahva yoki choy iching. Ozgina shokolad bo`lsa, yanayam yaxshi. Qarabsizki, ko`nglingizdagi qoraya boshlagan g`uborlar asta-sekin tarqab, o`rniga yana «quyosh charaqlaydi».
Biroz e`tiborsiz bo`lishni ham o`rganing. Har narsaga kuyib-pishaverishingiz o`zingizga zarar qilmasin. Muammolarni salgina ortga tashlasangiz, tashvishingiz ham kamayadi. Bu esa yaxshi kayfiyatni ta`minlaydi. Xush kayfiyat esa albatta asabni tinchlantiruvchi malhamdir!
Manba: Darakchi.uz