BB VA SS KREMLAR QAY BIRI AFZAL?

Ayollarning eng sevimli mashg`uloti do`kon aylanish. Ayniqsa, pardoz vositalari va atir-upa do`koniga qirib qolishca bormi... Biroq rastalaridagi turli tuman vositalarni ko`rib, shoshib qolishimiz ham bor gap. Tanlov imkoniyati kattaligidan o`zimizga mosini tanlash biroz mushkullik to`g`diradi. Keling bugun BB va SS vositalarning qay biri afzal degan savolga oydinlik kiritamiz. Mutaxassis — vizajist Farangiz Avezova.

BB krem — ingliz tilida (Beauty Balm Cream) go`zallik krem-balzami degan ma`noni bildiradi.

SS krem — bu qisqartma ham ingliz tilidan olingan bo`lib (Color Control) teri rangini nazorat qilish, tiniqlashtirish uchun krem degani.

DD krem — Daily Defense Cream esa kundalik himoya uchun degani.

Vazifalarini qanday bajaradi?

Tonal kremlardan farqli o`laroq BB va SS kremlar terini namlantiradi, oziqlantiradi, quyosh nuridan himoyalaydi va tabiiylik bag`ishlaydi. SS krem teridagi sariqlik va qizarishlarni, turi dog`lar va notekisliklarni oson bartaraf etsa BB kremning afzalligi uni ko`llashdan avval korrektor yoki asos talab etmasligida deyish mumkin. Qisqacha aytganda, ikkitasi birda. Qolaversa, ularning rangini aynan teringizga moslab tanlashingiz shart emas, o`zlari teri rangiga moslashib olaverishadi. SS kremlarning yana bir afzalligi bir necha bor ustma-ust surtish imkoniyatini berishidadir. Ya`ni pardozingiz kechga borib ko`rinishini yo`qotganini sezsangiz ustidan yana bir qavat huddi o`sha kremdan surtsangiz bo`ladi. Tonal kremga o`xshab ikki xil ko`rinish xosil qilmaydi. Bizningcha, har ikki vosita ham kosmetika javonimizdan joy olishga haqli.

Suyug`i yaxshiroqmi yo quyug`i?

Pardozimiz tabiiy chiqishida kremlarning konsistensiyasi ham muhim ahamiyatga ega. Albatta BB kremlar tonal asosga nisbatan suyuqroq hisoblanadi. Bu surtishga ancha qulay degani. SSlar esa BB turidan ham suyuqroq. Huddi o`zimiz biladigan yumshatuvchi kremdek ko`rinishda bo`ladi, teri rangini tiniqlashtiradi demasangiz, farqiga ham bormasligingiz mumkin. Vizajistlar uning bu xususiyatini juda qadrlashadi. Chunki asosiy krem qanchalik suyuq bo`lsa, “make up” shunchalik tabiiy ko`rinadi. Ha aytgandek, tarkibining suyuqligi tufayli bu vositani ko`z atrofi va qovoqning nozik terisiga surtsangiz ham bo`ladi. U ko`z ostining qorayishini va salqigan qovoqlarni osongina yashiradi. Aynan SS kremlardan foydalanuvchi xonimlarga yosh chegarasi qo`yilmagan. Axir u faqatgina dekorativ emas, parvarishlovchi kosmetika turiga ham mansub-da.

Mavsumga qarab tanlash kerak

SS kremlarning tarkibi suyuq bo`lgani uchun yog`li teri sohibalariga juda mos keladi. Yana mutaxassislar uni yozda qo`llashni, BBni kuz va vahorda, tonal kremni esa qish uchun asrab qo`yishni maslahat berishmoqda. Quruq teri sohibalari esa har uchchala vositadan foydalanishdan avval, albatta, namlantiruvchi krem surtganlari afzaldir. Yoki DD kremlarga ahamiyat bersinlar, chunki bunday vositalar teri rangini tiniqlashtirishdan ko`ra ko`proq uni namlantirish va oziqlantirishga mo`ljallangan.

Qay birining bozori chaqqon?

Qaysinisini ko`proq xarid qilishadi degan savol ham ahamiyatga ega. Chunki ishlab chiqaruvchilar vosita turini iste`molchining talabidan kelib chiqib ishlab chiqarishadi-da. Bugungi kunda tanlov imkoniyati BB kremalarda yuqori. Chunki ko`pchilik SS kremlar haqida ma`lumotga ega emas. Bundan tashqari turli ishlab chiqaruvchilarning mahsulot sifati turlicha bo`lgani uchun aynan o`zingizning teringizga mosini faqat sinab ko`rish usuli orqali aniqlashingizga to`g`ri keladi.

MAFTUNA tayyorladi.
Manba: Darakchi.uz