BOLALARNI BURJIGA QARAB MAKTABGA MOSLAShTIRAMIZ

Eng uzoq davom etgan ta`til ham o`z nihoyasiga etdi. Endi kichkintoyingizning maktabdagi hayoti qanday kechadi? O`qish unga xursandchilik olib keladimi? Sentyabrda ota-onalar nimalarga e`tibor qaratishlari lozimligi haqida bolalarga atalgan quyidagi munajjimlar bashoratidan bilib olasiz.

Qo`y

Birinchi chorakda farzandingizga har doim bir xil vaqtda kitob o`qishni, ongni charxlaydigan ko`rsatuvlarni tomosha qilishni, uyquga yotishni o`rgating. Sport bilan shug`ullansin.

Buzoq

Bu burjdagi bola o`z oldiga aniq maqsad qo`ya oladi. Ammo birgina «lekin»i bor. Buzoqlar qaysar bo`lishadi. Shoshilmaslik ularning shiorlari. Sabrli bo`ling, nima uchun bola maktabga borishi shartligini, nima uchun o`qituvchining gapiga quloq solishi kerakligini bosiqlik bilan obdon tushuntiring.

Egizaklar

Merkuriy – eng harakatchan sayyoralardan biri bo`lganligi sabab, bu burjda tavallud topgan bolalar ota-onalariga haqiqiy boshog`riq bo`ladilar. Darsda tez chalg`iydilar, bor ovozda gaplashadilar, partadoshi aytgan har qanday hazil gapga ovozini baralla qo`yib xoxolaydilar. Ammo zehni o`tkir bo`ladi.

Qisqichbaqa

Ta`sirchan va tez xafa bo`ladi. U o`zini xafa qilgan odamni kechirmaydi. Qolaversa, jamoada o`zini ko`rsatish qobiliyati ham yo`q hisob. Shu bois ota-onalar qisqichbaqa burjida tavallud topgan farzandlarini maktabga olib borishdan avval ruhshunosga ko`rsatishlari kerak.

Arslon

Arslon, bu – mitti qirol. U buyruq berishni, o`zgalarni, shu jumladan, kattalarni ham bo`ysundirishni yoqtiradi. Shu bois maktabda muammolardan xoli bo`ladi, deb o`ylash noto`g`ri. Bugun bir odam etakchi bo`lsa, ertaga uning o`rnini boshqasi egallashi mumkinligini to`g`ri tushuntiring. Arslon maqtovni yoqtiradi, demak, she`r yod oladimi, chiroyli yozadimi, xullas maqtovga arzigulik ish qilsa, albatta maqtang.

Sunbula

Uni tanqid qilmang, bosim o`tkazmang, kamchiliklari ustidan kulmang. Sumbula hamma narsada ota-onasidan o`rnak oladi. Farzandingizning ta`lim olishida muammolar bo`lishini istamasangiz, o`zingiz ko`proq kitob o`qing, ko`rgazma va muzeylarga boring.

Tarozi

Tarozi burjida tug`ilgan bolani keskin jazolash mumkin emas, bu harakat uni jazavaga solib qo`yishi mumkin. Tarozilarning kayfiyati keskin o`zgarib turadi. Shu bois maktabga qadam qo`ygan bolaning asab tizimini tartibga keltirishga harakat qiling: u bilan quvnoq o`yinlarni o`ynang, shovqin-suronli joylarga bormang. Uni bir vaqtda uyquga yotib-turishga o`rgating. Oqshom ertak so`zlab berishni unutmang.

Chayon

Tabiatan kurashuvchan. Kimdir ustidan hukmronlik qilishiga yo`l qo`ymaydi. Agar uni bo`ysundirishga urinishsa, aks natija ko`rsatib, u odamovi bo`lib qoladi. Chayonning tarbiyalash juda og`ir, u o`zi bilan xuddi tengdoshdek, muomala bilan gaplashishlarini talab qiladi. Chayonga nima yaxshiyu nima yomonligini tez-tez tushuntirib turish kerak.

Yoy

Yolg`izlikda tushkun kayfiyatga tushib qoladi. Agar u ko`paytirish jadvalini yod olmagan bo`lsa, uyingizga o`ziga o`xshagan “qoloq” sinfdoshlarini taklif qilib, birgalikda dars qildiring. Yoylar ko`pincha bir vaqtning o`zida ikkita ishni qilishni yaxshi ko`rishadi. Yodingizda tuting, bola ulg`aygan sayin dars qilish unga yoqmay boraveradi. Shu bois dilbandingizni tartibli bo`lishga o`rgatib boring.

Tog` echkisi

Farzandingiz jiddiy va mulohazakor. Uning boshida turishga hojat yo`q, u qachon nima qilishni sizdan ko`ra yaxshi biladi. Afsuski, bu burjda tug`ilgan bolalarning birgina kamchiligi — ular dam olishni bilmaydi. Ota-onaning vazifasi esa unga uyda mo`ta`dil muhitni yaratib berish.

Qovg`a

Bu burjda tavallud topgan bolalar ilmga chanqoq bo`ladilar. Ular hamma narsani tez ilib olishadi. Qovg`alarning muammosi jismoniy mashqlar bilan shug`ullanishni istamasliklarida. Ular soatlab kompyuter qarshisida o`tirishga tayyor, ko`chaga majburlab ham chiqara olmaysiz.

Baliq

O`zgarishlar bola qalbida qo`rquv hissini uyg`otishi mumkin. Shu bois farzandingizga maktab, yangi fanlar va ustozlar haqida ko`proq qiziqarli ma`lumotlarni ayting. Qo`liga pul berib, tejab-tergab ishlatishni o`rgating. Baliqlar boshlab qo`ygan ishlarini oxiriga etkaza olmaydilar. Shunday ekan, kitobini oxirigacha o`qib tugatishni, biror dasturni oxirigacha tomosha qilishni nazorat qilib boring.

Dilshoda tayyorladi
Manba: Darakchi.uz