«Дори ичиб семириб кетдим, энди озоламанми?»

— Гормонал воситалар ёрдамида даволанганимдан сўнг анчайин тўлишдим. Семизлик муаммога айланмасидан бурун озсам дегандим, аммо бу ишни қандай бажараман?

Нозима Абдуллаева, Тошкент вилояти

Саволларга шифокор-терапевт Шаҳноза САИДОВА аниқлик киритади.

— Гормонал воситаларнинг қабули одатда, иштаҳанинг яхшиланишини пайдо қилади. Бу эса табиийки вазн ортишига сабаб бўлувчи омиллардандир. Озмоқчи бўлсангиз, авваламбор организмни тозалаш чораларига диққат қаратинг. Гиёҳли чойлар (мойчечак, далачой, шивит суви)дан фойдаланишингиз мумкин. Наҳорга лимонли сув ичиш, қовоқ ёки зайтун мойини салатларга қўшиб истеъмол қилиш ҳам фойдали. Овқатланиш миқдорини камайтиринг, тез-тез – кунига 6 марта тановул қилишга одатланинг, таомлар орасида, албатта, иккитадан мева ёки сабзавот (мисол учун сабзи) енг, чақ-чуқлар, творог, қатиқ ёрдамида иштаҳани алданг. Ҳар куни камида 3-4 бекат пиёда юринг, вақтида ухланг ва зинҳор асабийлашманг, бу тамадди қилиш истагини фаоллаштириши мумкин.