​​​Kelinim homilador, qon bosimi ko`tirilib ketayapti...

"Ehtimol kun issiq bo`lganigami bilmadim, shu kunlarda kelinimning tobi yo`q. Tez-tez boshi og`rib qolayapti. Qon bosimini o`lchasak, ko`tarilgan bo`ladi. Farzand kutayotgan ayolda arterial qon bosimining ko`tarilishi xavfli deyishganiga xavotirdaman. Bunday paytda nima qilish kerak?"
Gulsum Mamajonova, Navoiy viloyati

Savolga akusher-ginekolog Gulnora PO`LATOVA javob beradi:

Vaziyatga baho berishda homiladorlikni rejalashtirishdan avval ham qon bosimining ko`tarilishi sodir bo`lganmi yoki yo`q, aniqlashtirish zarur. Bordiyu avvaldan gipertenziya mavjud bo`lib, ayol davolanib kelgan bo`lsa, kasallik xurujlarining oldini olish maqsadida shifokor bilan bamaslahat ish ko`rish lozim. Agar arterial qon bosimi to`satdan «sakray» boshlasa va bir necha marotaba takrorlansa, ushbu holatga birlamchi arterial gipertenziya sifatida qarash mumkin. Birlamchi gipertenziya farzand kutayotgan ayol uchun jiddiy muammolarga sabab bo`lishi ehtimoldan holi emas. Shuning uchun tibbiy tekshiruvlardan o`tish va bezovtalik omilini aniqlash lozim. Tibbiy xulosa bo`lajak onada arterial gipertenziyaning I,II bosqichlarini ko`rsatsa, davo choralari uy sharoitida o`tkazilishi mumkin. Xastalikning III, IV darajalari aniqlanganida esa stasionar sharoitida muolaja qilish lozim. Negaki bu holatda arterial gipertenziya buyrak, yurak va boshqa muhim ichki a`zolar faoliyatiga salbiy ta`sir ko`rsatishi mumkin. Arterial qon bosimi ko`tarilganida avval yirik va arteriol tizim bosimi o`zgaradi. Organizm me`yoriy jarayonni tiklash maqsadida mayda qon tomirlarni siqa boshlaydi. Buning natijasida shish paydo bo`lib, to`qimalar oziqlanishi buziladi. Zanjir reaksiyasi yuzaga kelib, moddalar almashinuvi jarayoni ham izdan chiqadi. Xavfli tomoni mazkur holat rivojlanayotgan homila va yo`ldoshga ta`sir ko`rsatishi mumkin. Fetoplasentar etishmovchilik (yo`ldosh tomirlarida qon aylanishining buzilishi) ning kelib chiqish sabablari ayni shu holat bilan izohlanadi. Keliningizni shifokor ko`rigiga olib boring, hozirda arterial gipertenziyaning har qaysi darajasi homiladorlikka mos tarzda davolanmoqda.
Manba: Darakchi.uz