KRAXMALLI BOTOKS

Ayollar hamisha go`zal va yosh ko`rinishni orzu qiladilar, ammo yillar o`zinikini olmay qo`ymaydi. Har doim ham qimmat salonlarga borish, botoks kabi muolajalarga sharoit bo`lavermaydi. Parvarishlashning eng ma`qul chorasi uyda tayyorlangan niqoblardir. Aynan shu maqsadda kraxmalli niqoblarni tavsiya qilamiz. Kraxmal tarkibida mikroelementlar, temir, xolin, kaliy va vitamin S kabi ajinlarni silliqlashtiruvchi moddalar mavjud.

Yodda tuting: yuzda yara va yallig`lanishlar bo`lsa, kraxmalli niqobni qo`llay ko`rmang.

1. 1 osh qoshiq kartoshka yoki makkajo`xori kraxmalini 1:1 ga nisbatda sut bilan aralashtirib, 1 choy qoshiq kosmetik moydan qo`shing. Bu niqob ta`sirchan yuz terili ayollarga juda mos.

2. Kraxmalga dengiz tuzini 1:1 nisbatda qo`shib aralashtiring. So`ng 4 osh qoshiq qirg`ichdan chiqarilgan bodringni ham qo`shing. Yog`li yuzlar uchun mo`ljallangan niqob tayyor.

3. 1 osh qoshiq kraxmalni 1 choy qoshiq tuz bilan aralashtirib oling. Bo`tqa holiga kelguncha iliq sut quying, so`ng 1 choy qoshiq suyuq asaldan ham solib yuboring. Bunday niqob yuzni qisqa muddatda yangilaydi, torttirib, silliqlashtiradi.

4. 1:1 nisbatda kraxmal va limon sharbatini aralashtiring. Bunday oddiy niqobni yuzda 10 daqiqadan ko`p ushlab turmang va 1 haftada 1 marta qilsangiz kifoya. Bundan tashqari bu niqob quruq va ta`sirchan yuz terisili xonimlarga to`g`ri kelmaydi.

5. Yarimta bananni ezib, bo`tqa holatiga keltiring-da 1 osh qoshiq kraxmaldan qo`shib niqob tayyorlang. Mazkur niqob yuzni namlantiradi, tashqi omillar ta`siridan tozalaydi va ajinlarni tekislaydi.

6. 1 stakan suvga 1 osh qoshiq kraxmal va 1 osh qoshiq yog`li smetanadan soling. So`ng 5 osh qoshiq sabzi sharbatidan ham qo`shib yuboring. Yaxshilab aralashtirib, mo`yqalam yordamida bir necha qavat qilib yuzga surting. Niqob 20 daqiqa davomida yuzingizda tursin. So`ng iliq suvda chayib oling.
Manba: Darakchi.uz