OZMOQChIMAN. HAMMOMGA BORAYMI, SUZIShGAMI?

Bir necha oydan keyin katta opamning to`yi. Ungacha besh kilocha ozsam degandim. Bir tanishim hammomga borib, bir oy ichida besh kiloga ozganini aytdi. Boshqa tanishim bo`lsa, suv havzasida shug`ullanishni tavsiya qilayapti. Haftasiga to`rt marta hammomga borsam ham, bir oy suv havzasiga qatnasam ham, o`rta hisobda bir hil mablag` sarflar ekanman. Aytingchi, bu usullarning qay biri samaraliroq?

Nargiz

Yog`dan xalos bo`lamizmi, suvdanmi?

Ko`pchilik yuqori haroratda teri ostidagi yog`larni eritish mumkin, deb o`ylaydi. Hatto, hammomga kirishdan avval va chiqqandan keyin taroziga turib, bir necha kilogrammdan xalos bo`lganini ta`kidlaydiganlar ham topiladi. Chindan ham tarozi o`qi biroz orqaga surilishi mumkin. Ammo jarayon organizmdan ter oraqali chiqib ketgan suyuqlik hisobiga kechadi. Tana suv balansini tiklab olganidan keyin hech narsa ko`rmaganday yana avvalgi holiga qaytadi. Aslida, bu fiziologik jihatdan normal holat. Shuning uchun chinakamiga ozishni istagan do`mboqlar amaliyotdan keyin kutilgan natijani sezishmaydi. Biroq so`zlarimizdan bu usul butunlay besamar ekan degan xulosaga kelmang. Agar bir muddat vazningiz kamaymay, “qotib” qolgan bo`lsa, aynan hammom va saunalar sizga yordam beradi. Chunki issiq harorat ta`sirida tana biroz stress holatiga tushib, odatiy vazn o`zgarishini rag`batlantira boshlaydi. Shundan keyin jismoniy mashqlarga murojaat qilsangiz, natija uzoq kuttirmaydi. Agar har ikki yo`nalishni to`g`ri moslashtira olsangiz, santimetrlaringiz jadalroq yo`qoladi.

Karbonat natriy + issiq suv

Internet tarmog`ida keng tarqalgan usullardan yana biri esa vannani issiq suvga to`ldirib, unga bir quti iste`mol sodasini solgancha vanna qilish. Amaliyotni qo`llab ko`rganlar natija yaqqol sezilganini ta`kidlashadi. Biroq bu safar ham vazndagi o`zgarishlar terlash orqali chiqib ketgan suvga borib taqaladi. Ammo sodali vannalar u qadar beziyon deb ham bo`lmaydi. Chunki inson terisining yuza qismida himoyalovchi yog`dan iborat yupqa plyonka qatlami mavjud. Iste`mol sodasi ta`sirida esa mana shu plyonkaga ziyon etadi. Oqibatda turli teri xastaliklari, ekzema, qizarish, achishish yuzaga keladi. Doimiy sodali vannalar terining tez qarishiga, ajin tushishi va turli toshmalarga sabab bo`lishi mumkin.

Kontrast dush

Suv haroratining keskin o`zgarishi natijasida mushaklar qisqaradi va tanada qon aylanishi jadallashadi. Demak moddalar almashinuvi ham o`z o`zidan tezlashadi. Shuning uchun bu muolajani boshqa mashqlar bilan birgalikda amalga oshirsangiz kutilgan natijaga erishasiz. Agar faqat kontrast dushning ko`magiga ishonib qolsangiz, o`zingizdan o`pkalayvering. Mutahassislar amaliyotni haftada ikki marta qo`llashni tavsiya etishadi.

Eng samarali chora suzish!

Qomatni qisqa fursatlar ichida chiroyli ko`rinishga keltirish uchun eng maqbul chora suzishdir. Chunki suzganda tananing hamma mushaklari baravariga harakatga keladi. Bir soat suvda suzgan kishi 400 kkal.dan xalos bo`ladi. Eng muhimi esa terining osilib qolishi, sellyulit kabi muammolardan uzoqda bo`lasiz. Lekin ko`zni quvontiradigan natijaga erishish uchun haftada uch marta bir soatdan shug`ullanish va albatta to`g`ri ovqatlanish tartibiga rioya qilish lozim.

MAFTUNA tayyorladi.
Manba: Darakchi.uz