QOMATGA MOS PALTO TANLASh SIRLARI

Har bir ayolning orzusi — har mavsumda moda bilan barobar qadam tashlab, ko`zni quvnatadigan, jozibali ko`rinishga ega bo`lish. Afsuski, hamma ham buning uddasidan chiqavermaydi. Odatda go`zal ko`rinishga ega bo`lishda ayollarga qomatidagi kamchiliklar xalaqit beradi. Shuni unutmangki, hamma vaziyatga echim bor! Istalgan ko`rinishdagi qomatni to`g`ri tanlangan libos bilan ideal holatga keltirish mumkin. Bugun qumsoat, olma, nok (A), uchburchak va to`g`ri to`rtburchak shaklidagi qomat turlariga mos palto tanlash sirlari bilan bo`lishamiz. Stilistlar orzungizdagi, qomatingizga mos palto topish o`ylaganimizdan ham osonligini ta`kidlashadi. Qanday qilib, degan savolga esa oltin formulani taqdim etishgan: A (moda tendensiyasi) + V (sizning bichimingiz) + S (sizga mos rang) + D (mablag`dagi imkoniyatingiz) = ideal palto!

«Qumsoat» — X shaklidagi qomat egalari

Ideal qomat! Bunday qomat egalarining go`zalligiga trapesiya bichimidagi, bir xil rangli, bezaksiz, yopishib turadigan palto urg`u bera oladi. Ularga deyarli hamma bichimdagi paltolar to`g`ri kelaveradi.

! Juda ingichka poshnali oyoq kiyimlardan voz keching. Uchi yumaloq tufli va etiklar siz uchun ayni muddao.

«Olma» — O shaklidagi qomat egalari

Bunday qomat egalari xipchabel emasligidan, qorin biroz chiqqanidan xijolat bo`lishadi. Uzunligi boldirgacha bo`lgan, klassik uslubdagi, qalin matodan tikilgan, e`tiborni tortadigan katta tugmali yoki yorqin rangdagi vertikaliga tushgan chiziqli palto «olmasimon»larni kelishgan qomat bilan ta`minlaydi. Chiroyli kapyushonli palto ham halal bermaydi. Bunda e`tiborni belingiz emas, yuzingizga qarata olasiz.

! Qorningizni to`g`ri tanlangan kofta bilan bekitishingiz mumkin.

«A» shaklidagi qomat egalari

Bu go`zal qomat egalari keng bo`ksa, xipchagina bel va tor elka bilan faxrlansa bo`ladi. «A» shaklidagi qomatli ayollar, palto tanlashda rangi bir xilligiga, beli va elkasiga e`tiborli bo`ling. Kontrast belbog`, katta hajmli yoqa go`zalligingizga urg`u beradi. Tizzadan sal uzun yo kalta palto, shohona yoqa, noodatiy eng elkalarni keng, qomatning yuqori va pastki qismlarini ideal qilib ko`rsatishda yordam beradi.

! Cho`ntakli liboslardan qoching. To`g`ri bichimdagi etiklar oyoq qo`njini yashirishga yordam beradi.

«T» shaklidagi qomat egalari

Elkasi keng, bo`ksasi tor va yassi bo`lgan «T» shaklidagi qomat egalariga tekis, uzun, mo`yna yoqali paltolar yarashadi.

! Paltoning pastki qismidagi mo`ynali bezagi e`tiborni bo`ksaga qaratadi. Keng kapyushon esa elkani ideal qilib ko`rsatadi.

«To`g`ri to`rtburchak» — N shaklidagi qomat egalari

Elka va bo`ksa kengligi bir xil bo`lgan bunday qomat egalariga tor, bir yoqlama tugmali, belbog`i katta hajmli, ikki taraflama yopishtirma cho`ntakli paltolar yarashadi. «N» shakldagi ayollar eng muhimi, bo`ksani keng ko`rsatish, elka chiziqlariga urg`u berish va belni tor ko`rsatadigan belbog`ga e`tibor qaratishi darkor.

! Istalgan libosni katta hajmli belbog` bilan kiying. U sizni nazokatli ko`rsatadi.

Eslatma

Savlatli qomat egalari, palto xarid qilayotganingizda cho`ntak, qaytarma yoqa, tugmalar kichik hajmli bo`lmasligiga e`tibor bering.
Nozikkina qomatli ayollarga esa katta hajmli, ko`zga tashlanadigan aksessuarli paltolar yarashmaydi!
Manba: Darakchi.uz