​​Ro`zadan so`ng semirib ketmay desangiz...

Ramazon oyi tugab, oynaga boqsak yoki torozuga chiqsak, avvalgidan sarvqomatroq bo`lib qolganimizni payqaymiz. Ha, o`zimiz sezmagan holda anchagina ozibmiz. Endi shu natijani saqlab qolish uchun nima qilish kerak? Oshqozonimizga ortiqcha yuk tushirmaslik uchun-chi?

Sog`lom turmush tarziga rioya qiling

Bu doim targ`ib va tavsiya qilinadigan usul. Ro`zani tutib bo`ldim, endi bir bo`lak pishiriqni taqsimchamga solvolib serialimni tomosha qilsam ham bo`laveradi, desangiz, xato qilasiz. Tez orada avvalgidan ham vazningiz oshib, tanangizda qon aylanishi buziladi. Ko`zgu qarshisiga boring, qarang, belingiz ingichka, bo`ksalaringiz ozg`in, ko`ylaklaringiz yarashib turibdi. Shu holatda qolishni istaysizmi yo yaqindagina sotib olgan ko`ylagingizni kiya olmay alamda o`tishnimi? To`g`ri qaror qabul qilishingizga shubhamiz yo`q.

Sportzalga yoziling

Siyqasi chiqqan gap bo`lsa-da, ayni haqiqat. Yoz oylari sportzalga ataylab borishning ham hojati yo`q. Yugurish, yurish, velosiped uchish – xullas, variantlar ko`p. Balki kimdir uy ko`tarish, gilam yuvishni ma`qul ko`rar, bu ham bo`laveradi. Xullas, mushaklaringiz faol harakatda bo`lishi kerak, ana shunda tanangiz yog` yig`maydi.

Taomnomangizni qayta ko`rib chiqing

Har narsadan o`zingizni tiying demaymiz. Faqat nima eyayotganingizni nazorat qilib boring. Kunduzi bir bo`lak tort edingizmi, demak kechqurun salat yoki yarim kosa qaynatma sho`rva bilan kifoyalaning. Yoz ne`matlari – baqlajon, qovoqcha, karam, gulkaram kabi sabzavotlardan turli salatlar tayyorlab esangiz bo`ladi.

Garderobingizni yangilang

Yoz mavsumiga bir necha engil ko`ylaklar sotib oling. Doim hozirgi o`lchamlaringiz va vazningizni saqlab tursangiz, bu ko`ylaklarni maza qilib kiyaverasiz, hatto keyingi yillar ham. Yangi qomatni chiroyli ko`rsatuvchi liboslar semirib ketmaslik uchun yaxshi rag`bat bo`ladi.

Nimadan semirishingizni aniqlang

Agar tabiatan to`lalikka moyilligingiz bo`lsa, vaqti-vaqti bilan parhez tutib turishga majbursiz. Tug`ruqdan keyin semirgan bo`lsangiz, maxsus mashqlarni bajarishingiz kerak. Agar stresslar tufayli ko`p ovqat eb semirayotgan bo`lsangiz, tuyaqushga o`xshab boshingizni qumga, yo`g`ey, muzlatkichga tiqmay, o`sha stresslarni bartaraf etishingizga to`g`ri keladi. 200 gramm shokoladdan oladigan endorfiningizni yugurish yo`lakchasidagi mashqlar bilan ham topa olasiz.

Taqiqlar emas, yangi imkoniyatlar haqida o`ylang

Sevimli ko`ylakka sig`ishmi yoki hansirashdan qutulishmi – farqi yo`q, nima siz uchun rag`bat bo`la olsa, o`shani deb harakat qiling. Unutmang, ortiqcha vazndan xalos bo`lib, siz nafaqat chiroyli qomatga ega bo`lasiz, muhimi, salomatligingizni tiklaysiz. Yo`qotganlardan faqat kilogrammlaringiz, topganlaringizdan esa go`zallik va salomatligingiz haqida o`ylang.

Qanday ovqatlanish kerak?

Mevalar, sabzavotlarni ko`p eng, ularda kletchatka ko`p bo`lib, qorinni tez to`ydiradi.
Yaxshilab chaynang. Ovqatlanish payti sokin musiqa qo`yib qo`ysangiz, u bir maromda, shoshilmasdan chaynashingizga yordam beradi. Ko`p chaynagan odamning qorni tez to`yadi, demak kamroq eydi.
Ovqatlanishni salat va sabzavotli sho`rvadan boshlang. Shunda ikkinchi, ya`ni ko`p kaloriyali taomdan kam eysiz.
Sabzavot va mevalarning sharbatini ichmang, o`zini eng. Ham kletchatka olasiz, ham tezroq qorningiz to`yadi. Sharbatlar esa aksincha ishtahani qitiqlaydi.
Shakarni kamroq eng. Choy va kofeni shakarsiz ichishga odatlaning.
Chanqoqni ochlikdan farqlashga o`rganing. Qorningiz ochsa, darrov ovqatga yopishmang, avval bir piyola toza suv ichib ko`ring. Biroz kuting, ovqat egingiz kelmay qolishi ham mumkin. Sizni ochlik emas. Chanqoq qiynayotgan bo`ladi.
Tishingizni tez-tez yuvib turing. Toza tish bilan darrov ovqatga o`tirgingiz kelmaydi, og`iz bo`shlig`idagi tozalikni uzoqroq saqlashni istaysiz.
Asosiysi, ro`za tutib, kamroq ovqatlanishga o`rgangan organizmingizga quloq soling, uni zo`riqtirmang.

Shahnoza SOATOVA tayyorladi.
Manba: Darakchi.uz