​Saratonga etaklovchi muolajalar!

Allergiya, shish, dog`lar... Kosmetik vositalar va muolajalarning nojo`ya ta`sirlari haqida ko`p va xo`p gaplashganmiz. Lekin ularning saratonga sabab bo`lishini hammamiz ham bilmaymiz. U er-bu erda qulog`imizga chalingan bo`lsa-da, «Shuncha odam foydalanayapti, hech narsa bo`lmayapti-ku» deya o`zimizni ovutamiz. To`g`ri, saraton xavfi mavjud degani, xastalikning yuzaga kelishi kafolatlanadi degani emas. Ammo «o`zingga ehtiyot bo`l, qo`shningni o`g`ri tutma» degan gaplar bejizga aytilmagan. Quyidagi ma`lumotlarimiz esa ham go`zal, ham sog`lom yashashni istaydigani ayollarga bag`ishlanadi.

Mutaxassis — dermatolog Nodira AKROMOVA.

Ehtiyot bo`ling, shellak!

Doim band, tirnoq parvarishi uchun ortiqcha vaqt ajrata olmaydigan ishbilarmon xonimlarning oltinga teng yordamchisiga aylangan shellak manikyuri teri, ayniqsa tirnoq artofidagi terida saraton yuzaga kelishini rag`batlatirishi aniqlandi. Chunki amaliyot davomida qo`llaniladigan ultrabinafsha nur taratuvchi lampalar teriga ziyon etkazadi. Bu nur teri saratoniga sabab bo`lishi olimlar tomonidan alllaqachon aniqlangan. Shuningdek, solyariyda toblanish ham xuddi shunday oqibatga olib kelishi mumkin. Qolaversa, ultrabinafsha nurlar ta`sirida bir qarashda beziyon ko`ringan oddiy xol ham xavfli o`simtaga aylanishi ehtimoli ortadi.

Lazerli epilyasiya

Avvaliga, lazer nurlarining turli ko`rinishlari mavjud ekanini eslatib o`tamiz. Biri teriga chuqur kirsa, boshqasi yuzakiroq ta`sir o`tkazadi. Shunga ko`ra, ta`siri ham turlicha. Biroq har qanday holatda ham teri nurlanishga uchraydi. Amaliyotni qayta va qayta takrorlash esa saratonni yuzaga keltiradi. Ayniqsa saratonga gumon qilingan kishilarga bunday nurlardan ehtiyot bo`lish qat`iy tavsiya etiladi.

Sochni laminasiyalash

Moda bilan hamnafas yashashni istaydigan xonimlar orasida tobora ommalashib borayotgan sochni brazilcha usulda keratinli laminasiyalash ham saratonni keltirib chiqarish xavfi yuqori amaliyotlardan ekanligini eslatib o`tamiz. Laminasiyani amalga oshirish uchun mo`ljallangan maxsus loson va niqoblar tarkibida formaldegid moddasi mavjud bo`lib, kuzatuvchilarning ta`kidlashlariga qaraganda aynan shu modda xastalik xavfini yuzaga keltiradi.

Antiperspirant va ko`krak saratoni: bog`liqlik bormi?

Ko`krak saratoni xastaligini o`rganayotgan bir guruh olimlar saraton yuzaga kelgan terida parabenlar miqdori nihoyatda yuqori ekanligini aniqlashgan. Bu modda neftni qayta ishlash natijasida paydo bo`lgan konservantlardan hisoblanib, asosan mahsulot uzoq saqlanishi uchun kosmetik vositalar tarkibiga qo`shiladi. Ayniqsa, antiperspirant va dezodarantlar tarkibidagi parabenlar ko`krakka yaqin joyda foydalanilgani uchun ushbu a`zoda saratonni yuzaga keltiradi, degan faraz ilgari surilmoqda. Biroq shu kungacha bu ma`lumot tasdiqlangani ham, inkor etilgani ham yo`q. Har ehtimolga qarshi, ogoh bo`lish ziyon qilmaydi.

MAFTUNA tayyorladi.
Manba: Darakchi.uz