​“Semizman, xunukman, yomon erga chidayman...”​ ishonchni sundiruvchi komplekslar haqida...

O`zimiz o`ylab topgan muammolar – komplekslar kishining ishonchini so`ndiruvchi omillardan sanaladi. Men ulardan holiman, deysizmi? Keling, tashqaridan bir nazar tashlaymiz. Agar o`zingizda bu belgilarni sezmasangiz, nur ustiga a`lo nur. Aksincha bo`lsa... O`qiganlaringizni komplekslardan ozod bo`lish yo`lidagi birinchi qadam sifatida qabul qilavering.

JISMONIY KOMPLEKSLARIMIZ

Nimgadir, ko`zguga nazar tashlagan har bir ayol o`zidan aqalli bitta bo`lsa-da, ayb topadi. Atrofdagilarning birortasi bu nuqsoni payqamasa hamki, uning o`ziga bu katta muammo bo`lib ko`rinaveradi. Mana ulardan eng ko`p tarqalgalari:

Men semizman

Qomatga nisbatan e`tirozlar doim birinchi o`rinda turgan. Eng ketvorgan, sarvqomat sanamlar ham “figura”si bundan-da chiroyliroq bo`lishini istaydi. Turli parhezlar bilan tanasini qiynab, har xil liboslar ostiga qomatini yashirishga urinadi.

Aslida esa

Bizning zamonamizda go`zallikning qat`iy qonun-qoidasi yo`q. Ishonmaysizmi, shou-biznes yulduzlariga boqing. Dryu Berrimor yoki o`zimizning Halimaxonim naqadar talabgir aktrisalar. Erkaklarning fikricha, ayol kishidagi joziba uning semiz-ozg`inligi bilan belgilanmaydi, aksincha, noz bilan gapirib, karashma bilan yurgan xonimlar kuchli jins vakillari e`tiborini ko`proq jalb qilar ekanlar.

Bo`yim uzun

Yana bir kompleksimiz bo`y bilan bog`liq. Bo`yi baland bo`lsa ham – bir navi, past bo`lsa ham. Novchadan kelgan qizlar yoshlikdanoq «laylak» degan laqabdan qo`rqib bukchayib yuradilar, kamiga poshnali poyafzalni o`zlariga dushman sanaydilar. Jussasi kichkinasichi? Maktabda uni «pakana» deb masxara qilishgan va u baland bo`yli tengdoshlariga xavas qilib yurgan.

Aslida esa

To`g`ri, odatda bo`yimizga qarab umr yo`ldosh tanlaymiz. Undan bo`yim baland (yoki juda past) bo`lib qolsa-ya, deb qo`rqamiz. Ammo, buni qarangki, baland bo`yli erkaklar odatda kichkinagina ayollarni xush ko`rishar ekan, past bo`ylilar esa novchagina, qo`l oyoqlari uzun sanamlarga e`tibor qaratisharkan. Sizga bir sirni ochamiz, bo`yning muvaffaqiyatga umuman ta`siri yo`q. Demak, bor bo`yingiz bilan faxrlansangiz arziydi.

Xunukman

Peshonam katta, yuzim uzunchoq, burnim yapaloq, labim ingichka... Xullas, har qanday ayol ko`zgugadagi aksiga qarab hayolidan o`tkazadigan gaplar. Xo`sh, unday bo`lsa aytingchi, zamonaviy kosmetologik vositalar bekorga o`ylab topilganmi? Professional vizajist sehrli cho`tkalari yordamida har kimni ham parivashga aylantira oladi. Bundan foydalanib qolmaslik ayb emasmi?

Aslida esa

Biz yashirishni istayotgan aksar kamchiliklarimiz erkaklar nazarida fazilat bo`lib ko`rinishi xech gap emas. Ustiga-ustak, ular hech nuqsonsiz qo`g`irchoqqa o`xshagan go`zallarni emas, biron o`ziga xos jihati bor ayollarni osonroq eslab qoladilar. Masalan, hollivudning eng sertabassum go`zali – Juliya Roberts yoki yunonlarga xos qiyofaga ega Barbara Streyzandni olib ko`ring. Ularning hech biri go`zallikning beto`xtov chaynalgan standartlariga mos kelmasada, tashqi ko`rinishidan mamnun.

MA`NAVIY KOMLEKSLAR

Ba`zida komplekslarimiz domida qolib ketganimizni o`zimiz ham sezmaymiz. Ammo aynan shu yashirin muammolarimiz tufayli shaxsiy hayotda baxtga, ishda esa muvaffaqiyatga erisholmayotgan bo`lishimiz mumkin.

Kuloyim kompleksi

Orzular olamida yashovchi qiz. Uning erkaklar haqidagi tasavvuri faqat ishqiy dostonlaru romantik filmlar asosiga qurilgan. O`sha asarlarda tasvirlargan hech bir nuqsonsiz yigitni kutadilar.

Aslida esa

Eng yaxshisini kutib, umrni o`tkazib yuborayotgan dilbarning haqiqiy yori shundoqqina yonginasida yurgan bo`lishi mumkin. Kuloyimning uzoqni ko`zlab tuzgan rejalariga bu yigit negadir kirmagan, chunki, u shahzoda roliga munosib emas-da. Erkaklardan haddan ortiq ko`p narsa talab qilib bo`lmaydi. Imkon bermasangiz, uning fazilatlarini qayoqdan bilasiz, oyimqiz? Balki shu yonginangizdagi yigit sizni malikalardek e`zozlay oladigan shahzodadir va aynan u bilan hayotingiz ertakdagidek o`tar. Unga yaxshilab bir qarab ko`ring-chi...

Amazonka kompleksi

Bu o`ziga haddantashqari ishongan ayollar kompleksidir. Ishbilarmon, o`ziga ishongan ayolning oilada o`z tizginini eriga tutqazishi qiyin masala. Shu sababli oilaviy hayotda muammolar yuzaga kelaveradi.

Aslida esa

Eng qat`iyatli ayol ham kuchli bir erkakning elkasiga bosh qo`yib, uning panohida o`zini ojiz sezgisi keladi. Lekin negadir, bunday erkaklar hadeganda uchrayvermaydi. «Xotinim hammasini o`zi eplayapti-ku» deb jon koyitmaydiganlar esa har daraxtdan to`kilguday. Shu sababli erkak kishining oldida kuch va irodangizni namoyon qilavermay, biroz yordamga muhtoj bo`lib ko`ring, natijasi, albatta, sizga ma`qul keladi.
Qurbon kompleksi

Ayollar tabiatan atrofdagilarga, ayniqsa erkaklarga nisbatan e`tiborli va ziyrakroqdirlar. Kimgadir g`amxo`rlik qilish qonimizda bor xislat. Ammo ba`zida bu xislat haddan ortib, kasallik darajasida namoyon bo`ladi. Ya`ni bo`lar-bo`lmasga o`zini qurbon qilaverish kasalligi. Masalan, ichaverib, uraverib eri jondan to`ydirgan ayolga dugonalari: «Senga nima zarur, bo`ldi, ket, ajrash, o`z joningni o`yla» desalar, ayol: «Uni qanday tashlab ketaman, mensiz tamom bo`ladi-ku» deb javob beradi va qiynalib yuraveradi. Ersiz qolgan ayol boshqa turmush qurishni o`ylamay, bir o`zi farzandini katta qilaveradi: «hozir faqat bolam haqida o`ylashim kerak». Axir, qachon o`zingizni ham o`ylaysiz, ayollar?!

Aslida esa

Yaqinlariga g`amxo`rlik qilish – xayrli ish. Ammo ko`r-ko`rona g`amxo`rlikning ham chegarasi bor. U inson naqadar qadrli bo`lmasin, o`zni qurbon qilaverish yaramaydi. Balki ishni shu qurbonlikiz, yaxshi bir tadbir bilan oson hal etish mumkindir. Ayol vaziyatdan chiqishning boshqa yo`llarini ham izlab ko`rishi kerak. Masalan, uradigan er bilan ruhshunosga borish, ichishni boshlaganini esa narkologga ko`rsatishni ortga surmang. hayotdan zavqlanib yashang, ana o`shanda atrofingizdagilarga ham baxt ulasha olasiz. Asabiy erkaklarga tinchlantiruvchi damlamalar ham yordam berishi shubhasiz.

Shahina tayyorladi.
Manba: Darakchi.uz