Yoga kutilganidek foydali bo‘lib chiqmadi

Olimlar yoga bilan shug‘ullanishning o‘ziga yarasha salbiy tomonlari bor ekanligini aniqladi. Aniqlanishicha, qadimgi hind amaliyoti suyak va mushak og‘riqlariga va hatto kattagina jarohatlarga ham olib kelishi mumkin. Yogaga bag‘ishlangan tadqiqot natijalari Journal of Bodywork and Movement Therapies jurnalida chop etildi, deb xabar beradi “Nauka”.

Yoga nafaqat sharq mamlakatlarida, balki g‘arbda ham mashhur. Ko‘p hollarda yoga bilan shug‘ullanish tayanch skeletlari — harakatlanish tizimi buzilgan insonlarga muqobil terapiya sifatida tavsiya qilinadi. Avstraliyaning Sidney universiteti tadqiqotchilari kuzatishlar va tajribalar natijasida yoga mijozlar uchun ham foydali, ham zararli bo‘lishi mumkin degan xulosaga keldi.

Ular yoga bilan shug‘ullangan bemorlarda og‘riq bilan bog‘liq holatlar yiliga 10 foizdan ortiq qayd etilayotganini aniqladi. Shuningdek, aniqlanishicha u bilan shug‘ullanish tayanch-harakat apparatida mavjud muammolarni kuchaytirib yuborishi ham mumkin. Shuning uchun olimlar shifokorlarning bu turdagi ko‘rsatmalariga diqqatliroq bo‘lishni maslahat bermoqda.
Manba: Daryo.uz