«YoRIMIZ KO`NGLIGA YO`L TOPAMIZ...»

Xarakterimiz bir-biriga to`g`ri kelmadi!» Bu mashxur ibora zamirida nafaqat turmushdagi muammolar, balki er-xotinning nozik munosabatlari ham yotishini bilarmidingiz? Biz ayollar tan olishni istamagan achchiq haqiqatni statistika ma`lumotlari tasdiqlaydi: o`rtadagi sovuqlik «shaxsiy hudud» ob-havosiga 90 foiz holatlarda dahl qiladi! Sahifamiz orqali erkakdagi xohishning yo`qolishi, ayoldagi istaklarning so`nishi haqida juda ko`p sirlashamiz. Bu safar esa kasalliklaru o`zaro kelishmovchiliklarni nari surib, juftimiz ko`ngliga yo`l topish sirlarini o`rganamiz. Xuddi ilk uchrashuvdagi his-tuyg`ular, etni jimirlatgan xayajonu yurakka titroq solgan onlarni yodga olamiz! Xo`sh, nima dedingiz?!

«AYoL SIFATIDA QIZIQTIRMAY QO`YDIM...»

Sarlavhani o`qishingiz bilan bi-i-ir xo`rsinib qo`ydingiza, kelishib olaylik shu oxirgisi bo`lsin! Muammo nimada? «Allamahalgacha televizor tomosha qiladi» deysizmi? Siz ham unga sherik bo`ling. Bir safar zerikarli futbolni ko`rsangiz ko`ribsiz, sizdan nima ketdi?

«Ur-yiqitlarga xushim yo`q, qo`rqinchli kinolardan qo`rqaman!» Shumi bahonangiz? Juftingizning yonidan joy oling-da, qo`llaridan tuting. Yoki pinjiga suqilib olsangiz, vahimangizdan asar ham qolmaydi. Shu bahona so`nib borayotgan tuyg`ular alanga olsa ajabmas.

«U ko`rayotgan narsalarni tushunmayman!» So`rang, qiziqing, g`ururingiz eyilib qolmas. U ham bilsin, o`ziga qiziq mavzularga befarq emasligingizni.

Shpargalka:

Erkaklar qiziqarli suhbatdosh bo`la oladigan ayollarni qadrlashadi. Avtomobil qismlariyu falon futbolchining nima uchun sariq kartochka olganini tushunmasangiz, «Bo`lganim shu» demang. Bo`sh qolganda dugonalar bilan g`iybatni kamaytiring-da, o`z ustingizda ishlang.
Umr yo`ldoshingizning tanlovini hurmat qiling! «Kap-katta erkak ko`rib o`tirgan narsangizni qarang» kabi «ashulangiz» jonli ijroga chiqmasin. «Lisenziyasiz» qolasiz-a.
Eringiz oromkursida uxlab qoldi. Shu holicha qoldirmang. Asta uyg`oting-da, yotog`iga olib kiring. Ertasiga jahl qilsa, «Sizsiz ko`zimga uyqu kelarmidi?» deya noz-karashma qiling, er-i-ib ketsin.
Muammo qaynonangizga bog`liq ekan, arqonni uzun tashlang-da, «Oyijon, xizmatingizdaman» dasturini ishga tushiring. Onasining ko`nglini zabt etolsangiz bas, o`g`lini shunday yo`lga soladiki, tungi navbatchiligidan ham voz kechadi.
Yotoqxonadagi narsa-buyumlar joyini almashtiring. O`rin-ko`rpani yangilang. Yorqin, ko`zga lov etib tashlanadigan yotoq jildlaridan foydalaning. Uxlash vaqti yaqinlashdimi, yopinchiqni asta ko`tarib qo`ying.
Har tarafga (hech bo`lmasa ikkita) shamchalarni yoqing. «Onaqirolicha»ning uyquga ketishini kutayotgan eringiz, hech bo`lmasa yotog`iga mo`ralab qo`yar. Ko`zlarini quvnating deymiz-da.
«ONAM EShITIB QOLADI...»

Ko`p qavatli uylar yoki katta oilalarda yashaydigan er-xotin o`rtasidagi munosabat uydagi «qo`shni»lardan hijolat bo`lish sabab ham sovushi mumkin. «To qaynonam uxlamaguncha, erim yotoqqa kirmaydi. Onasi bilsa, xafa bo`larmish» deysizmi? Balki qaynonangiz o`g`lini sizdan qizg`anar, yo darrov eringizning xushtori bor deb o`yladingizmi? Hovliqqan ayol tufliga yolchimas iborasini eshitganmisiz? Aql bilan fikrlang.

KO`ZGUGA QARANG!

Go`zallik saloniga borolmayotganingizni bahona qilmang. Momolarimiz qoshiga o`sma, ko`ziga surma surtib ham go`zallikni do`ndirishgan. Salgina e`tiborli bo`lsangiz, chiroyingiz ochiladi. Tungi kiyimlarga ahamiyatli bo`ling, deb har safar uqtirganimiz uqtirgan. Xo`sh, amal qilayapsizmi? Atiringizni-chi yangiladingizmi? Yog` bosgan sochlarga jon kirib, ajinlar mo`ralab qolgan yuzingizni parvarishlayapsizmi? Qo`l-oyoq terisi dag`allashmaganmi? Fahmlagan bo`lsangiz, xulosa qilishni o`zingizga qoldiramiz.

«U BIR YoNDA, MEN BIR YoN...»

Juftingiz bilan bir-biringizga ters o`girilib yotasiz. Nozik munosabatlarni esa parvoyiga ham keltirmaydi. Xo`sh, nima qilmoqchisiz? «Plan-A»: tunda sochi yoki elkasini silab oromini o`g`irlang. Uyqusi buzilganidan biroz achchiqlanadi-yu, keyin yumshaydi. «Plan-B»: ertalab bo`sa bilan uyg`oting. Bir safar tushunmas, ikkinchi safar hayron bo`lar, uchinchisida ma`qullaydi.

«KASALMAN» DEMANG!

Quvnoq, samimiy, zavqu-shavqqga to`la va o`ziga ishonchi baland ayol har qanday erkakning orzusi! Kuchli jins vakillari noliyveradigan, pessimist va kasalchin xonimlarga toqat qilishmaydi. Biz, sog`ligingizdagi jiddiy xastaliklarni aytmayapmiz. Har bir ayolda uchrashi mumkin bo`lgan «molochnisa», bavosil, turli toshmalar xullas dori qutichamizni tez-tez yo`qlab turadigan «mehmon»larni ko`zdan pana tutgan ma`qul demoqchimiz. Surtmayu shamchalar, gigienik vositalarni javonda saqlang. Hayron bo`larsiz-u, ammo mana shu holatlar ham erkakning xohishini so`ndirishi mumkin.

«U MENI EShITMAYDI!»

Eshitadi! Qulog`iga shivirlab so`zlab ko`ring. Quloq sohasining atrofida insonning erogen nuqtalari joylashgan. Јazabdan qaynab turgan yoxud «Meni tinch qo`y, uyqim kelayapti» «plastinka»sini yoqib qo`ygan juftingizning quloqlarini muloyim so`zlar bilan siylang, ko`rasiz ko`ziga uyqu kelarmikan. Ishdan kutib olganda ham sekingina «Sizni sog`indik» deb pichirlab qo`ying. Ikkingizdan bo`lak hech kim eshitmasin. Qani shundan keyin ham eshitmaydi deb ko`ringchi...

«PSIXOLOGIYaSINI TUShUNING»

E`tiborsizlik ayblovini qo`yishdan osoni yo`q. Biroq o`ylab ko`ring, u nima uchun o`zgarib qoldi? Ehtimol, sog`ligida, ishida yoki do`stlari bilan muammosi bordir? Balki ota-onasi bilan biror masala kelib chiqqan-u, sizga bildirmas. Erkak muammosini uyga olib kelmaydi. Shunday ekan, ko`ngliga qo`l solib ko`ring. Uyda osoyishta muhit yarating, ortiqcha savollar bilan bezovta qilmang. Mehr bering, ammo o`ziga kelib olgunicha mehr so`ramang. Asta-sekin hammasi o`nglanadi.

(alohida)

Xarakteriga ko`ra erkaklar poligam bo`lishadi. Ya`ni ularni bir xillik tez zeriktirishi mumkin. Bu sifat nafaqat munosabatlarga balki yotoqqa ham taalluqli. Ehtiroslar alanga olishi uchun nozik munosabatlarda bir-biringizni tushuning, bir-biringizni o`rganing va istaklaringizga quloq tuting.

Androlog-seksapotolog Dilmurod ERGAShEV tavsiyalari asosida MARJONA tayyorladi.
Manba: Darakchi.uz