“Zelyonka”ni qanday ketkazish mumkin?

Suvchechak bilan og‘rigan bolaning qo‘liga yoki boshqa joylariga bexosdan to‘kilib ketgan ko‘kdori (“zelyonka”) izini qanday ketkazish mumkin? Bu savolni ko‘pchilik bunday yorqin va ko‘zga tashlanuvchi dog‘lardan qutulishni xohlagan kishilar berishadi.

Ko‘kdori izini yuz va qo‘l terisidan qanday ketkazish mumkin?

Terini spirt, odekolon yoki aroqqa botirilgan paxta bilan arting. Agar spirtga bir necha tomchi limon sharbati qo‘shilsa, dog‘ni ketkazish oson bo‘ladi.

Ko‘kdori izini bolaning terisidan qanday ketkazish mumkin?

Bolaning nozik va ta’sirchan terisini tozalash uchun vodorod peroksidi yoki xlorgeksidinga botirilgan sochiqcha mos keladi. Bu moddalar tarkibida spirt bo‘lgan vositalardan ko‘ra xavfsizroqdir.

Suvchechakdan keyin boladagi ko‘kdori izini qanday ketkazish mumkin?

Suvchechakdan keyin ko‘kdori izini ketkazishning eng yaxshi va sinalgan usuli – bu yog‘li krem, yaxshisi bolalar kremidan foydalanish. U zararli ta’sirlar, qizarish va allergiya chaqirmaydi, yaxshi samara beradi va sovunli eritma yordamida yuviladi. Bu amalni tez-tez va bir necha marta takrorlang.

Ko‘kdori izini allergiyasi bo‘lgan katta yoshli kishilardan qanday ketkazish mumkin?

Terisida muammosi bo‘lgan kattalar uchun skrab, tonik yoki makiyajni tozalovchi vositalardan foydalanish mumkin. Ko‘kdori dog‘lari bu vositalar bilan bir kunda bir necha marta artiladi. Ular birdan emas, balki asta-sekinlik bilan ketadi.

Ko‘kdorini qo‘ldan qanday ketkazish mumkin?

Teridagi ko‘kdori izini ketkazishning yana bir usuli – xlor (oqartiruvchi). Lekin uni ehtiyot bo‘lib ishlatish kerak va yuz terisiga, shuningdek allergiya bo‘lgan hollarda foydalanmaslik lozim. Qo‘lingizdagi dog‘ni xlorga botirilgan mato bilan arting, keyin tezda iliq suv bilan yuving va krem surib qo‘ying.
Manba: Daryo.uz