Kecha

Дилимда улғаяр ойдин бир сабот,
Тўлқинли кечада сокинлик қумсаб.
Пичирлаб самога қоқаман қанот,
Қанийди кўзимни хотиржам юмсам.

Келажак мавҳумот, ўтмишим – абас,
Гуллар қовурғамни эзар бу кеча.
Орзулар юртидан карвон тугамас,
Қанийди кўзимни юмсам тонггача?!.

Дунё – азаллардан қоронғу ҳужра,
Аллақачон келмай қўйгандир ваҳмим.
Бесаноқ, бу файзсиз оломон ичра
Бечора онамга келади раҳмим –

Соғинар тонггача гуноҳкор юзим.
Мени ҳам шу соғинч қўйвора қолса –
Кошкийди тонггача илинса кўзим,
Кошкийди онам ҳам сал ором олса!..