Onajon (2018)

Sevganimni sizdan ham,
Afzal bildim onajon.
O‘sha qizni o‘ylab man,
Kasal bo‘ldim onajon.

Kechiring men nodonni,
Do‘st bilibman shaytonni,
Ajratishni o‘rgandim,
Yaxshi bilan yomonni.

Oqshomlari qon yutib,
Zahar ichdim, onajon.
Kech bo‘lsada sevgimdan,
Endi kechdim, onajon.

Onajon, siz yig‘lamang,
Aqlim kirdi har holda.
Qumdan qasr quribman,
To‘zg‘ib ketdi shamolda.

Makru tuzoq ilkidan,
Endi qochgum, onajon,
O‘g‘lingizni avrolmas,
Endi hech kim onajon.

Onajon, Ahad endi,
Kechagi yosh bolamas.
Yaxshiga quchoq ochib,
Yomonlikni xohlamas.