Onasizlik dardin onasiz bilar

Onasizlik dardin onasiz bilar,
Otasizlik jabrin otasiz bilar,
Ey farzand asragin shular ikkisin,
Ota-onang senga faqat do'st bo'lar!

Onajonim sizga rahmat deb turgin,
Otajonim sizga rahmat deb turgin,
Doim duolarin sen olib yurgin,
Ota-onang senga faqat do'st bo'lar!
Kim sababli shu kunlarga yetding sen,
Kim sababli sinovlardan o'tding sen,
Ular qolib kimning qo'lin tutding sen,
Ota-onang faqat senga do'st bo'lar!
Omading kelganda qo'l berganlarga,
Ishing yurishganda yo'l berganlarga,
Ishonma omonat dil berganlarga,
Ota-onang faqat senga do'st bo'lar!
Har kimni do'st bilib siringni aytma,
Katta yo'lga chiqding ortingga qaytma,
Fursat g'animatdir bilgin bu paytda,
Ota-onang faqat senga do'st bo'lar!
Yolg'on va'dalarga uchma do'stginam,
Juda ko'p aldandi Ahad Qayum ham,
Ikki inson bordir sirdosh har bir dam,
Ota-onang faqat senga do'st bo'lar!

Onasizlik dardin onasiz bilar,
Otasizlik jabrin otasiz bilar,
Ey farzand asragin shular ikkisin,
Ota-onang senga faqat do'st bo'lar!