Ramazonga yetganim haqqi

Муҳаммадсиз кўнгиллар қора,
Йўл бермасанг тополмам чора,
Ё, Зулжалол, тавбамга қара-
Рамазонга етганим ҳаққи.

Волидамнинг айбини ўчир,
Падаримнинг гуноҳин кечир,
Ўзинг раҳмат шаробин ичир-
Рамазонга етганим ҳаққи.

Номаҳрамдан бургин кўзимни,
Ёлғонлардан асра сўзимни,
Ҳисоб қилай токи ўзимни-
Рамазонга етганим ҳаққи.

Қай гўшада мўъмин дили қон,
Гўдаклари ўқ еб берар жон,
Қил уларнинг мушкулин осон,
Рамазонга етганим ҳаққи.

Осон қилгин сабр кечасин,
Армон қилма Қадр кечасин,
Борсам... нур қил қабр кечасин-
Рамазонга етганим ҳаққи.