Endi qayoqqa

Дилоро, айт, ўзи бу қандай ғамки,
Дунёни инкорлар этаверибман.
Ортимдан балолар эргашса ҳамки,
Мен сенинг ортингдан кетаверибман.

Бу яйдоқ йўлларда олмабман тин ҳам,
Азобларни қўрқмай ютаверибман.
Тўхташ нималигин билмабсан сен ҳам,
Мен сенинг ортингдан кетаверибман.

Ҳеч қурса бир бора ғамим емабсан,
Қишу ёз бир хилда ўтаверибман.
Сен ҳамки лоақал тўхта демабсан,
Мен сенинг ортингдан кетаверибман.

Бошим оғавериб сен кетган ёққа,
Йўлнинг тугашини кутаверибман.
Дунё тугаб қопти... Энди қаёққа???
Мен сенинг ортингдан кетаверибман!