СЕНСИЗ ҚАНДАЙ ЯШАЙМАН

Этма ўзингдан жудо, сенсиз қандай яшайман?

Жонга тегди "алвидо", сенсиз қандай яшайман?

Баҳор кетди боғимдан, сув ўтмас томоғимдан,

Беқарорман, бенаво, сенсиз қандай яшайман?

Банд бўлиб васфинг аро кезай боғ-у роғларни,

Булбулдек тарат наво, сенсиз қандай яшайман?

Кўнглим ҳоли паришон, қилма манзили вайрон,

Ишқингда бўлиб гадо, сенсиз қандай яшайман?

Май-ла ғарибу танҳо, қолмайин мен девона,

Лаъл шарбати гуворо, сенсиз қандай яшайман?

Кўнглим сандин ўзгани, топмади жонга лойиқ,

Сен-ла дард топгай шифо, сенсиз қандай яшайман?

Ки жамолинг руҳафзо, офтоби олам аро,

Солмагил бошга савдо, сенсиз қандай яшайман?