Sensiz men

Sensiz men , go'yoki tushga o'xshayman,
Uyg'onsam, lahzada ketaman o'chib,
Qanoti lat yegan qushga o'xshayman,
Dardlarga suyangan, uchishdan cho'chib.

Sensiz men, manzilsiz , uysiz yo'lovchi,
Kezаman siyqa bir qo'shiqni aytib.
Bir mujmal kuymanu, yo'q bir tinglovchi,
Bitta falsh notada yuraman daydib.

Sensiz men yakuni topilmagan she'r,
Arzimay qolaman bir juft ko'zlarga.
O, Tangrim, qo'llagin, o'zing to'zim ber,
So'zlarga yetkazgin , yaxshi so'zlarga.

Sensiz men orzuman ushalmaydigan,
Harchand intilmagin, erishib bo'lmas.
Bir kasal, bemorman tuzalmaydigan,
Netay, bu dard bilan kelishib bo'lmas.

Sensiz bo'g'zim ichra o'tmaydi nafas,
Yolg'iz umidimsan ertangi kunga.
Sensiz yashamoqni ep ko'rmayman, bas,
Sensizlikni ravo ko'rma bugunga.

Yolg'iz umidimsan ertangi kunga...

Abdumutalib Ergashaliyev