Ayrildik-da haqida she'r

Taqdirimiz juda-juda qiziq bo'ldi,
Oramizda qalin qora chiziq bo'ldi,
Izlarimiz qayrildilar, uziq bo'ldi,
Endi bizlar ayrildikmi?
- Ayrildik-da!

Uzangancha qolib ketdi kalta qo'lim,
Otam rozi bo'lmadi deb alda gulim,
Shu aldoving yuragimga dalda gulim,
Endi bizlar ayrildikmi?
- Ayrildik-da!

Qaldirg'ochqosh terildiyu kamon bo'ldi,
Soch oqardi, rangim esa somon bo'ldi,
Yomon bo'ldi! Yomon bo'ldi!! Yomon bo'ldi!!!
Endi bizlar ayrildikmi?
- Ayrildik-da!

Tushlarimda sevgimizga qabr qildim,
Bu tushimni men teskari ta'bir qildim,
Sabr qildim, yuragimga jabr qildim,
Endi bizlar ayrildikmi?
- Ayrildik-da!

Muhabbatim - ochilmayin qolgan g'uncha,
Bemehrning dastidan dod solgan g'uncha,
Yolg'on-yolg'on sug'orishdan so'lgan g'uncha,
Endi bizlar ayrildikmi?
- Ayrildik-da!

Nima derdim peshonaga yozgan Xudo,
Taqdir ekan bo'lmoqligim sendan judo,
Baxtli bo'lgin, ko'rishmasak, abad alvido,
Endi bizlar ayrildikmi?
- Ayrildik-da!