Dardi borlar sabrli bo'lsin

Bu dunyo o'tkinchi, bu dunyo bir kam,
Kimnidir baxt yuqlar, kimni esa g'am.
Kim hayotdan shodon, kimning ko'zi nam,
Baxti borlar shukrli bo'lsin,
Dardi borlar sabrli bo'lsin.

Kim baland cho'qqini pastga almashar,
Tilladay baxtini xasga almashar.
Dushmanni bir sodiq do'stga almashar,
Baxti borlar shukrli bo'lsin,
Dardi borlar sabrli bo'lsin.

Yo'qchilikda burda nonni qadr etib,
Tuz ham totmay, qaro kunga sabr etib.
Omad kelsa, yaqinlarga jabr etib,
Baxti borlar shukrli bo'lsin,
Dardi borlar sabrli bo'lsin.

Noshukurlik boshga bir kun ofat solar,
Noshukurlik el ichra oh, rasvo qilar.
Noshukurlik shaytoniylik paydo qilar,
Baxti borlar shukrli bo'lsin,
Dardi borlar sabrli bo'lsin.

Ash'or bitib Ahad ayt neni izlar,
Faqat yaxshilikni u sizga ko'zlar.
To'g'ri yo'ldan adashmaylik aslo do'stlar,
Baxti borlar shukrli bo'lsin,
Dardi borlar sabrli bo'lsin.

Bu dunyo o'tkinchi, bu dunyo bir kam,
Kimnidir baxt yuqlar, kimni esa g'am.
Kim hayotdan shodon, kimning ko'zi nam,
Baxti borlar shukrli bo'lsin,
Dardi borlar sabrli bo'lsin.