Kuz yomg'iri

Tun yarmidan o'tganda,
Uyqu qochar ko'zimdan.
Oy bulutga botganda,
Yomg'ir yog'adi birdan.

Nima bo'ldi, bu kecha?
Yig'lar osmon qizlari.
Ko'z yosh to'kmasin qancha,
Yuvilmas ishq izlari.

Mungli qo'shiq aytgandek,
Shivirlaydi tomchilar.
Yerga emas, vodarig',
Yuragimga tomchilar.

Bahor o'tib, yoz o'tib,
Kuzlar qoldi xazonda.
Ikkimizni bir ko'rmay,
Yog'ar yomg'ir osmondan.

Bu bulutlar qalbimiz,
Bezab go'zal hislarga.
Sevgi degan samoni
Tanitgandi bizlarga.

O, kuzda g'uncha ochgan
Atirgulsan bog'imda.
Asrar edim men seni,
Yuragim ardog'ida.

Singan dilimni beg'am,
Sinarmikin yomg'irlar?
Agar , men ham yig'lasam...
Tinarmikin yomg'irlar?

Abdumutalib Ergashaliyev