O'zbegim (2019)

Dushmanlarning zarbiga qo'rqmay ko'kragin tutgan,
Yovga boshin egmagan qaddi baland o'zbegim.
Bobolarim jahonni qalamla zabt aylagan,
Dovrug'ingni taratgan tilda doston o'zbegim.

Bir suqum tuprog'ingga kimlar zor bo'lmadilar,
Kindik qonim to'kilgan, hur bo'stonim o'zbegim.
Tarixing qalblarda jo, muhrdek tamg'alangan,
Asrlab avlod asrar, iymoni but o'zbegim.

Musaffo osmoningda tinchlik hayot barqaror,
Quyoshing porlab turgay, el muazzam o'zbegim.
Dunyo kezib seningdek mehmon do'st topolmadim,
Bag'ri keng bu diyorni, baxti bekam o'zbegim.

Millatimiz oridan g'urur zavol topmagay,
Jonimni fido aylay, jannatmakon o'zbegim.
Yovuzlarning qo'lidan asray umrim yetguncha,
Kelajagin porloq kun, gullab yashna o'zbegim.