O'zing uchun ham yashagin ayol

Bolam deb jonningni qurbon aylading,
Yelkangga tuganmas ro'zg'or boylading,
Dardlaring aytolmay yolg'iz yig'lading,
O'zing uchun ham yashagin ayol.

Tashvishdan ortolmay damni unutding,
Xo'rlikka ko'z yumib alamni yutding,
Mashaqat ketidan rohatni kutding,
O'zing uchun ham yashagin ayol.

Jilmayib dunyoga mehringni sochding,
Yuragi zorlarga ko'nglingni ochding,
Atirgul sanchig'in bag'ringga quchding,
O'zing uchun ham yashagin ayol.

Yusupova Zulfiya.