Qo'rqmaysizmi

O‘rnim bosarmikan duch kelgan malak,
Meningdek bo‘larmi ming joni halak,
Sovib, bo‘lib qolsam, parvoyi falak,
Meni yo‘qotishdan qo‘rqmaysizmi yor?

Qay fursatda o‘chdi ko‘ngil cho‘g‘ingiz?
Qay tomonga uchdi sevgi o‘qingiz?
Bir kun qiziqtirmay bor-u yo‘g‘ingiz,
Meni yo‘qotishdan qo‘rqmaysizmi yor?

Gʻamimni o‘zimga ortib yashadim,
Mehrsizlik zahrin totib yashadim,
Sizni yo‘qotishdan qo‘rqib yashadim,
Meni yo‘qotishdan qo‘rqmaysizmi yor?

Hasratlarga ketsa yuragim to‘lib,
Voz kechsam, baridan qo‘l siltab, kulib,
Ketsam, yoningizga hech qaytmas bo‘lib,
Meni yo‘qotishdan qo‘rqmaysizmi yor?

Bir bor so‘ramaysiz holu ahvolim,
Fikri o‘yim sizda, sizda xayolim,
Qo‘rqaman tutmasin sizni uvolim,
Meni yo‘qotishdan qo‘rqmaysizmi yor?

SHAHNOZA RO‘ZIYeVA