УЗР СЎРАЙ AЛЛОҲДАН

Узоқ юрдик ҳаёт йўлидан,
Кимни обод, кимни хор этдик.
Топганимиз билмай омонат,
Йўқотганда қадрига етдик.

Қўрқоқ дедик андиша қилса,
Кибор бўлса эгавердик бош.
Алдадилар, алдадик биз ҳам,
Ёлғонларда ўтиб кетди ёш.

Дустни сотдик нархи келишса,
Не қилмадик фойдани кўзлаб.
Хаққи тупроқ кўзимиз туймай,
Боравердик қалбимиз музлаб.

Алла айтдик, мудради иймон,
Сўнг шайтонни ўпдик пойини.
Неча кимни додлатиб кетдик,
Ичиб туриб ширин чойини.

Хар қадамда болалар гунох,
Савоб билан ўтдик сўрашмай.
Давра қурдик тенгларни топиб,
Тенг келмаса қаторга кўшмай.

Ўғлимиз эр, қизимизда бўй,
Бизлар ҳамон нафсимизга қул.
Турфа сабаб, ваъжларни айтиб,
Қара ўзни оқлаймиз нуқул.

Виждоним тур, иймоним уйғон,
Сўқир кўзлар талпин зиёга.
Нафсим тийил, шукрни ўрган,
Бизлар меҳмон бир зум дунёга.

Тўхта эй дўст, нафасинг ростла,
Бу кетишда манзил жаханнам.
Аллоҳимга узрларинг айт,
Узр сўрай Aллоҳдан мен ҳам.